«Avropa Oyunları» zolaqlarına girən sürücülər cərimələnəcəkmi? - İZAH

Dünəndən paytaxtın bəzi küçələrində “Avropa Oyunları” zolaqlarının yaradılması sürücülərimizdə xeyli suallar yaradıb. Avtosfer.az saytına ünvanlanan suallarda sürücüləri əsas 2 məsələ maraqlandırır: bu zolaqlarda hərkət rejimi necə olacaq? Həmin zolaqla hərəkət edən sürücüləri cərimələyəcəklərmi?

Bu suallara aydınlıq gətirilməsi üçün hüquqşünas Ərşad Hüseynova müraciət etdik. O bildirdi ki, həmin zolaqlar hazırda mövcud olan şəkildə olmamalıdır. Bu zolaqlar ümumi istifadədə olan nəqliyyat vasitələri üçün nəzərdə tutulan xüsusi hərəkət zolağı kimi fərqləndirilə bilər. Lakin bunun üçün həmin zolaqların təşkilinə, xüsusən tənzimləmə vasitələri ilə işarələnməsinə dair qanunvericiliyin bütün tələblərinə riayət olunmalıdır. Hələlik bu işlərin tam başa çatmadığı görünür. Sürücülər isə hələ ki, cərimələrdən narahat olmasınlar, çünki bugünkü vəziyyətdə həmin zolaqlarda hərəkəti qadağan edən nişanlar və xətlər yoxdur. Lakin buna hazırlaşmaq lazımdır. Bu zolaqlar ümumi istifadədə olan nəqliyyat vasitələri üçün nəzərdə tutulan xüsusi hərəkət zolağı kimi təchiz edildikdən sonra yol hərəkətinin həmin zolaqlardan istifadəyə dair tələblərini pozan sürücülər cərimələnə  bilərlər. Cərimənin məbləği isə pozuntunun mahiyyətinə uyğun olacaq.

Hüquqşünas söz verdi ki, sabah bu məsələyə daha ətraflı şərh verəcək.

Bu gün isə Ələt-Astara magistralının Lökbatan dairəsindən Bibiheybət məscidinə qədər olan hissəsində və əks istiqamətdə “Oyunlar zolağı”nın işarələnməsi işləri aparılacaq. Yolda hərəklərin intensivliyini nəzərə alan Nəqliyyat Nazirliyi “Azəryolservis” ASC işləri sutkanın qaranlıq saatında, yəni saat 22:00-da səhər saatlarınadək aparacaq. Bu zaman yolda gçstərilən müddət ərzində nəqliyyat vasitələrinin hərəkəti qismən məhdudlaşdırılacaq. 

Anspress-in məlumatına görə, Nəqliyyat Nazirliyi “Azəryolservis” ASC I Avropa Oyunlarında müəyyən edilmiş marşrut üzrə əsas yol şəbəkəsində “Oyunlar zolağı”nın işarələnməsi işlərinə aprelin 27-dən start verib. “Oyunlar zolağı”nın çəkilişinə ilk olaraq Ziya Bünyadov prospektindən başlanılıb. Prospektdə “Oyunlar zolağı”nın çəkilişləri artıq tam olaraq yekunlaşdırılıb.

Qeyd edək ki, eni 3,75 metr olan “Oyunlar zolağı”nın kənarlarında 25 santimetr enində sarı xətt və asfalt üzərində isə təyin ediləcək yerlərdə Bakı Avropa Oyunlarının loqotipinin şəkli çəkiləcək. I Avropa Oyunlarında müəyyən edilmiş marşrut üzrə əsas yol şəbəkəsində “Oyunlar zolağı”nın çəkilişi işlərinin 20 gün müddətində davam etdirilməsi nəzərdə tutulub. Daxili İşlər Nazirliyinin Baş Dövlət Yol Polisi İdarəsi tərəfindən “Oyunlar zolağı”na nəzarət ediləcək və kənar maşınların bu zolaq ilə hərəkəti tamamilə məhdudlaşdırılacaq.

İdmançıları, texniki heyəti və media yayım şirkəti nümayəndələrini “Atletlər” və “Media kəndi”ndən məşqlərə və idman obyektlərinə aparmaq üçün Heydər Əliyev prospekti - Ziya Bünyadov prospekti -“20 Yanvar” dairəsi - 20 Yanvar tuneli - Bakı-Sumqayıt yolundan geriyə (Beynəlxalq Avtovağzal ərazisindən) - Bakı Dairəvi yolu - Bakı-Ələt yolunun 2-14 km hissəsini birləşdirən marşrut, bundan başqa Ziya Bünyadov prospekti - Atatürk prospekti - Tofiq Bəhrəmov adına Respublika stadionu, həmçinin Ziya Bünyadov prospekti - Atatürk prospekti - Vaqif küçəsi - Hənifə Ələsgərov - Cəlil Məmmədquluzadə küçələri - Heydər Əliyev adına İdman Konsert kompleksini birləşdirən marşrutlardan istifadə ediləcək.

Ümumiyyətlə Nəqliyyat Nazirliyi “Azəryolservis” ASC tərəfindən I Avropa Oyunlarında müəyyən edilmiş marşrut üzrə yol şəbəkəsinin yaxşılaşdırılması məqsədilə nəzərdə tutulan tikinti və təmir işləri sürətlə davam etdirilir. Bütün növ çatışmayan yol nişanları, göstərici lövhələr quraşdırılır və nişanlama xətlərin çəkilməsi işi aparılır.Bütün işlər tərtib olunmuş qrafik üzrə həyata keçirilir.

Avtosfer.az