Bir yolda 2 keçid var; biri altda, biri üstdə - VİDEO

Bir yolda yan-yana 2 keçid var. Biri yeraltı, digəri isə yerüstü. Sürücüləri çaş-baş salan bu piyada keçidləri paytaxtın Nərimanov rayonu Fətəli xan Xoyski prospektində - Tofiq Bəhrəmov adına stadiona gedən yolda yerləşir. Eyni mənzərə Dövlət Bədən Tərbiyəsi və İdman Akademiyasının qarşısındakı yolda da yaşanır. Burada da yeraltı piyada keçidi olmasına baxmayaraq, keçidin bir neçə metr yaxınlığında yerüstü piyada zolağı da qoyulub. Bəzi piyadalar isə özlərini təhlükəyə ataraq, yerüstü keçiddən istifadə edirlər.

Ekspertlər isə bu cür piyada keçidlərinin qəza şəraiti yaratdığını bildirirlər. "Yol hərəkəti haqqında" qanunda isə piyada keçidləri arasında məsafə konkret olaraq göstərilib.

"Azəryolservis"dən isə "Xəzərə Xəbər"ə bildirildi ki, Tofiq Bəhrəmov adına Stadiona gedən yoldakı yeraltı piyada keçidi müvəqqəti istifadəyə verilib. Tam istifadəyə verildikdən sonra həmin keçid dövlət aktı ilə "Azəryolservis"in balansına veriləcək. Bundan sonra isə həmin keçidin yanında olan piyada zolağı ləğv ediləcək. Dövlət Bədən Tərbiyəsi və İdman Akademiyasının qarşısındakı yolda olan keçidə gəlincə isə, bildirildi ki, orada piyada keçidini bildirən nişan götürülüb. Bunun üçün də piyadalar yoldakı zolaqdan deyil, yeraltı keçiddən keçməlidirlər.