Maşını nömrəsiz sürənlər üçün yazı...

Sürücülər yaxşı bilirlər ki, avtomobili dövlət qeydiyyat nişanı olmadan idarə etmək qanunla qadağan olunur. Buna baxmayaraq, paytaxt küçələrində nömrəsiz maşınlara tez-tez rast gəlinir. Qanun keşikçiləri onları saxlayanda isə müxtəlif bəhanələr gətirirlər - "oğurlayıblar", "itirmişəm". Bəlkə də onların sözlərində həqiqət payı var, ancaq Yol Hərəkəti Qaydaları istənilən halda nömrəsiz maşın sürməyi qadağan edir.  Bakıda və ölkənin digər yerlərində nömrəsiz maşınlar tərəfindən vurulan piyadaların sayı az deyil. Onların bəziləri təcili yardım gələnə qədər dünyalarını dəyişiblər. Belə olan halda isə günahkarları tapmaq çətin olur. 

Avtosfer.az xəbər verir ki, day.az saytı məsələ ilə bağlı Bakı Şəhər Dövlət Yol Polisi idarəsindən şərh alıb. Qurumdan bildiriblər ki, yol polisi inspektorları nömrəsiz maşın görən kimi saxlayırlar. Belə maşınların sahibləri 40-60 manat dəyərində cərimə olunur. Nömrələr istehsalçının müəyyənləşdirdiyi yerdə olmalıdır. Bəzən sürücülər nömrələri ön şüşənin altından qoyurlar. Bu da qayda pozuntusudur. Əgər nömrə oğurlanıbsa, itibsə və ya qəza nəticəsində yararsız hala düşübsə, maşını sürmək olmaz.