Nəqliyyat kartı problemi necə həll olunacaq? - AÇIQLAMA

Bəzi sərnişinlər "Bakubus" avtobuslardan istifadə etmək istəyərkən ödəniş kartının olmaması və ya onun balansının artırılması problemi ilə üzləşirlər. Avtosfer.az xəbərə verir ki, bu barədə milli.az-a müraciət edən oxucular nəqliyyat kartları üçün terminalların azlığından şikayət edirlər. Ödənişin nəqliyyat kartları vasitəsilə edilməsi tələb olunan "Bakubus" avtobuslarından istifadə etmək istəyərkən bəzən ödəniş kartının olmaması və ya onun balansının artırılması problemi ilə üzləşdiklərini deyirlər. Belə ki, bəzən onların durduğu dayanacaqda "Bakıkart" terminalları olmur. Vəziyyətdən çıxmaq istədikdə isə ya terminalların olduğu metro stansiyaları uzaq olur, ya da terminalın ən yaxın başqa hansı dayanacaqda olduğunu bilmirlər.

Bununla bağlı milli.az-ın sorğusunu cavablandıran "Bakıkart" layihəsinin rəhbəri Ceyhun Əliyev məsələyə aydınlıq gətirib: ""Bakıkart" terminallarının harada qoyulacağı "Bakubus" avtobusları xətlərə çıxmazdan öncə əvvəlcədən planlaşdırılır və terminallar yalnız öncədən planlaşdırılan yerlərdə quraşdırılır. "Bakubus"ın yeni marşrutları açıldıqca isə quraşdırılan terminalların sayı da artacaq. Bundan əlavə, bu problemi avtobus dayanacaqlarından və metro stansiyalarından başqa, mətbuat köşklərində də həll etmək olar. Belə ki, həmin köşklərdə də kartların satışı və balansının artırlıması mümkündür. Lakin təəssüf ki, bəzi sərnişinlər bundan məlumatsızdırlar".

Qeyd edək ki, "Bakubus"ın hava limanı xətlərindəki terminalları qalıq xırda pul qaytarır. Məsələn, bunu "28 May"dakı və ya hava limanındakı terminalda görmək olar. Amma şəhərdaxili yerlərdəki terminallar bu funksiyanı yerinə yetirmir. Çünki əvvəlcədən bu layihə planlaşdırılanda hər bir şəxsin özünə lazım olduğu qədər pulu gətirib terminaldan istifadə etməsi nəzərdə tutulub.