Qaçaraq yolu keçənlər: Nə işıqfor, nə də polislər onları durdura bilmir - FOTO

Bir müddətdir ki, metronun "28 May" stansiyasının yaxınlığında yerləşən "28 mall" ticarət mərkəzinin qarşısındakı piyada keçidinin yanına işıqfor qoyulub. Bundan əlavə orada polis əməkdaşları da vəziyyətə nəzarət edirlər. Bu gün bəhs edəcəyimiz məsələ də bundan ibarətdir. 

Adıçəkilən ərazidə hər zaman piyada-sürücü davası yaşanırdı. Çünki piyadalar üçün zolaqlı xəttin olması və ticarət mərkəzinə gedib-gələnlərin çoxluğu sürücülərin 10-15 dəqiqə hərəkətsiz gözləməsinə və dolayısı yolla tıxacların yaranmasına səbəb olurdu. 

Buna görə də, keçidin yanına işıqfor da əlavə edilib. İşıqforla nizamlanan piyada keçidi həm sürücülərin, həm də piyadalara rahatlığı və təhlükəsizliyi üçün əladır. Lakin vətəndaşlar hələ də yol hərəkəti qaydalarına riayət etmirlər.

İşıqfor piyada üçün qırmızını göstərsə də, bəzi şəhər sakinləri buna məhəl qoymadan, hoppana-hoppana, qaça-qaça yolu keçməyə cəhd edirlər. Bu zaman onları yolun qarşı tərəfində 3-4 polis əməkdaşı qarşılayır və 20 manat cərimə edir. Bu da sakinlərlə polis arasında mübahisələrə səbəb olur. Avtosfer.az xəbər verir ki, məsələni yaxından görüb, araşdırmaq üçün musavat.com-un əməkdaşı bəhs edilən ərazidə olub.

Keçidin yanında dayanıb, müşahidə apardıq. Polis əməkdaşları vətəndaşlara dəfələrlə xəbərdarlıq edirdilər, yenə də yolu qaydaları pozaraq, keçənlər var idi. Ərazidə olduğumuz 15 dəqiqə ərazində bir neçə nəfər cərimə olundu, bəzilərinə isə şifahi xəbərdarlıq edildi.

 

Yolu düzgün keçməyən şəhər sakinləri ilə də söhbətləşə bildik. Ramal adlı tələbə deyir ki, o, yeni qoyulmuş işıqfordan xəbərsizdir. Buna görə də, cərimə edilməsi haqsız bir addımdır: "Fikirləşin ki, hər gün gedib-gəldiyiniz bir yola işıqfor qoyurlar. Sizin də bundan xəbəriniz yoxdur. İşıqfora fikir vermədən yolu keçirsiniz və buna görə sizi cərimə etmək istəyirlər. Necə hiss keçirərsiniz? Mən indi o hissi keçirirəm". 

 

Sevinc Dadaşova isə qaydanı tələsdiyi üçün pozduğunu deyir: "Rəfiqəm gözləyir. Bir az gecikmişəm. Tələsdiyim üçün yolu qaça-qaça keçdim, heç işıqfora baxmadım. Yaxşı ki, sadəcə, xəbərdarlıq edildi. Əks halda, tələbəyəm və 20 manat mənim üçün böyük puldur". 

 

 

Söhbət etdiyimiz şəhər sakinləri işıqfordan xəbərsiz olduqlarını desələr də, bu, bir az inandırıcı görünmür. Çünki işıqforlar gözlə görünən yerdə qurulub. Polislər hər kəsə xəbərdarlıq edirlər. İşıqforda nə zaman hərəkət etmək, nə zaman durmaq lazım olduğunu orta məktəbdə keçirlər. Bunu bilməmək mümkün deyil.

 

Sürücülər işıqfora baxmayaraq, hələ də problemin tam aradan qalxmadığını deyirlər: "Buraya işıqfor qoydular. 70-80 faiz kömək edib. Daha əvvəlki kimi tez-tez "Ay qardaş, ay bacı imkan ver, gedək. Yolu bağlama, maşının qabağına qaçma" demirik. Lakin buna baxmayaraq, hələ də kimsə qırmızıda qaça-qaça yolu keçir. Sanki camaat başa düşmür ki, maşın onu vura bilər, əzə bilər. İraq olsun, ya ölər, ya da şikəst qalar. Bizim camaat qaydaları, onlara əməl etməyi sevmir. Görmüşük ki, mədəniyyətli olmağı, davranış qaydalarını uşaq olanda öyrədərlər. Amma indi vəziyyət dəyişib. İnsanlara qaydaları, mədəniyyəti cərimə edərək, öyrədirlər. Necə ki, "Nizami" kinoteatrının qarşısında 3-4 min adam cərimə ediləndən sonra daha heç kim yolun üstü ilə keçmir, burada da elə olacaq". 

 

 

Yaxınlıqda taksi fəaliyyəti məşğul olan Coşqun adlı şəhər sakininin sözlərinə görə, polis ərazidən gedən kimi, insanlar işıqfora baxmırlar: "Mən indi anladım ki, bu camaat düzələn deyil. Polis burada dayananda işıqforu gözləyənlər olur. Düzdür, bəziləri gözləmir. Lakin onların da bu tələskənliyi elə özlərinə 20 manata başa gəlir. Polis buradan gedən kimi aləm yenə qarışır, bir-birinə... Biz mədəni ola bilmirik. Bilmirəm niyə, amma bizdə alınmır. Ancaq bir çarə var. Daim nəzarət və cərimələr... Bir dəfə cərimə edilən adam, ikinci dəfə o səhvi etməz. Çünki pul itirəcək". 

 

 

Ümid edirik ki, qısa müddət ərzində hər kəsin bu işıqfordan xəbəri olacaq və qaydalara riayət edib, yolu normal şəkildə adlayacaqlar. Yəqin ki, heç kəs boş yerə 20 manat cərimə edilmək istəməz.