Ziya Məmmədovun "Kalaşnikov"ları nə vaxt susacaq? – VİDEO

Yadınızdadırsa, Bakı sakinlərini bir müddət əvvəl nağıllara inandırmağa çalışırdılar. Dövlət qurumu nəqliyyat sistemindəki vəziyyətin müsbət mənada dəyişəcəyini, islahatları nağılların gerçək olması kimi insanlara sırımaq istəyirdi. Bakıya Nəqliyyatı İntellektual İdarəetmə Sistemi gəlirdi.

Avtosfer.az xəbər verir ki, bu barədə Nəqliyyat Nazirliyinin sözçüsü Namiq Həsənov milli.az-a müsahibəsində dəfələrlə demişdi ki, Bakının avtobusları saat kimi işləyəcək. Elə dəqiq ki, daha sərnişinin dayanacaqda dayanmağına ehtiyac olmayacaq. Guya istifadə edəcəyimiz avtobusun dayanacağa çatma vaxtı elə dəqiq olacaq ki, elə evdən çıxıb həmin an birbaşa marşruta minəcəyik. 

Namiq müəllimin həmin vədlərinin üstündən artıq bir neçə il keçib. Paytaxt sakinləri intellektual sistemin çəkilməsi üçün küçələrin qazılmasına, saatlarla yollarda vaxtlarını itirməyə dözüblər. Təki saat kimi işləyən mexanizm gəlsin, problemləri bitsin, Bakı normal şəhər nəqliyyatına sahib olsun. "Nağıl" kimi sistem Bakıya gəldi, işə düşdü. İşə düşən intellektual sistem yox, videoda görəcəyiniz eybəcərliklərdir. Maraqlıdır, bizi həsrətlə gözlətdirdikləri intellektual sistem bu idi? Kalaşnikov avtomatı kimi imtinasız şaqqıldayan, beyinləri aparan konduktorlar, yoxsa hələ bir az da gözləyək?